30 05 2023

Անօդաչուների հարձակման միջոցով Կիևի իշխանությունները փորձում են ՌԴ ղեկավարությանը սադրել նմանատիպ պատասխանների․ Պուտին

Անօդաչուների հարձակման միջոցով Կիևի իշխանությունները փորձում են ՌԴ ղեկավարությանը սադրել նմանատիպ պատասխանների․ Պուտին

Մոսկվայի վրա ուկրաինական անօդաչու թռչող սարքերի հարձակման միջոցով Կիևի իշխանությունները փորձում են վախեցնել Ռուսաստանի քաղաքացիներին և  Ռուսաստանի ղեկավարությանը սադրել նմանատիպ պատասխանների։ Այս մասին երեքշաբթի հայտարարել է ՌԴ նախագահ Վլադիմիր Պուտինը Զոտովի կենտրոն կատարած այցի ժամանակ՝ մեկնաբանելով այսօր առավոտյան Մոսկվայի և Մոսկվայի մարզի վրա անօդաչու թռչող սարքերի հարձակումը:

Ինչպես գրում է ՏԱՍՍ գործակալությունը, երկրի ղեկավարը մայրաքաղաքի վրա հարձակումը կապել է այն բանի հետ, որ Ռուսաստանի զինված ուժերը որոշ ժամանակ առաջ հարվածներ են հասցրել Ուկրաինայի ռազմական հետախուզության շտաբին։

Պուտինի խոսքով՝ Ռուսաստանի Դաշնությունը հարվածներ է հասցնում Ուկրաինայի տարածքին, բայց դա անում է «հեռահար ճշգրիտ զենքով»:

ՌԴ արտաքին գործերի նախարարությունն էլ իր հերթին հայտարարել է, որ խստորեն դատապարտում է մայիսի 30-ի վաղ առավոտյան Մոսկվայում և Մոսկվայի մարզում «Ուկրաինայի զինված ուժերի կողմից իրականացված ահաբեկչական հարձակումների փորձերը»։ «Արմենպրես»-ի փոխանցմամբ՝ այս մասին հայտարարություն է տարածել Ռուսաստանի արտաքին քաղաքական գերատեսչությունը:

«Նման հարձակումները թեև ռազմական տեսանկյունից անիմաստ են, բայց, կարծես, ուղղված են բացառապես քաղաքացիական անձանց դեմ՝ նպատակ ունենալով խուճապ տարածել խաղաղ բնակչության շրջանում», - նշվում է հայտարարությունում։

ՌԴ ԱԳՆ-ում հավելել են, որ «Կիևի վարչակարգին Արևմուտքի աջակցությունը մղում է Ուկրաինայի ղեկավարությանը ավելի անխոհեմ հանցավոր գործողությունների»:

«ՆԱՏՕ-ի պաշտոնյաների հավաստիացումները, որ Կիևի վարչակարգը հարվածներ չի հասցնի Ռուսաստանի տարածքի խորքերին, ինչպես պարզվում է, ամբողջովին կեղծ են։ Ռուսական կողմն իրեն իրավունք է վերապահում ամենախիստ միջոցներ ձեռնարկել՝ ի պատասխան Կիևի վարչակարգի ահաբեկչական հարձակումների», - եզրափակել են ՌԴ ԱԳՆ-ում։

Ըստ France24-ի՝ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել է, որ Կիևն ուղղակիորեն ոչ մի կապ չունի ԱԹՍ-ներով հարձակման հետ, սակայն «բավարարված է՝ տեսնելով այդ հարձակումները և կանխատեսելով դրանց թվի ավելացումը»:

ՌԴ պաշտպանության նախարարության տվյալներով՝ հարձակումներն իրականացվել են ինքնաթիռի տիպի 8 անօդաչու թռչող սարքերի միջոցով։ Դրանցից 3-ը ոչնչացվել են ռադիոէլեկտրոնային պայքարի միջոցներով, կորցրել են վերահսկողությունը և շեղվել նախանշված թիրախներից, իսկ 5-ը խոցվել են «Պանցիր-Ս» զենիթային հրթիռահրանոթային համալիրով:

Ինչպես ավելի վաղ հաղորդել էր «Արմենպրես»-ը, միջադեպի հետևանքով տուժածներ չկան: ԱԹՍ-ների ընկնելու հետևանքով թեթև վնասվել են մի քանի շենքեր:

Այս փաստի առթիվ ՌԴ Քննչական կոմիտեն քրեական գործ է հարուցել։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ