10 03 2022

Ամենայն Հայոց Կաթողիկոսն ընդունել է ՀՅԴ Բյուրոյի նորընտիր անդամներին

Ամենայն Հայոց Կաթողիկոսն ընդունել է ՀՅԴ Բյուրոյի նորընտիր անդամներին

Մարտի 9-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց ՀՅԴ նորընտիր Բյուրոյի անդամներին՝ առաջնորդությամբ Բյուրոյի ներկայացուցիչ Հակոբ Տեր-Խաչատուրյանի։

Կուսակցության ներկայացուցիչները Վեհափառ Հայրապետին տեղեկություններ փոխանցեցին ՀՅԴ 34-րդ Ընդհանուր Ժողովի աշխատանքների և արձանագրած արդյունքների վերաբերյալ, անդրադարձ կատարեցին ՀՅԴ հետագա գործունեության առաջնահերթություններին և առաջիկա անելիքներին։

Այս առիթով Ամենայն Հայոց Կաթողիկոսը ներկաներին շնորհավորեց Բյուրոյի կազմում ընտրվելու կապակցությամբ՝ կարևորելով Հայրենիքի առջև ծառացած մարտահրավերների և առկա ճգնաժամի հաղթահարմանը, ազգային ոգու բարձրացմանը, Հայաստան-Արցախ-Սփյուռք կապերի զորացմանն ուղղված ջանքերը։

Հանդիպման ընթացքում Նորին Սրբությունը և ՀՅԴ Բյուրոյի անդամները քննարկեցին հայրենական կյանքն ու աշխարհասփյուռ ժողովրդին հուզող հիմնախնդիրները, ընդգծեցին համազգային միասնականության ամրապնդման անհրաժեշտությունը։ Առկա խնդիրների դիմագրավման գործում կարևորվեց Հայոց Եկեղեցու ազգաշահ առաքելությունը։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ