12 05 2023

ՄԻ ԲԱՐՁՐ ՏԵՂ․ Նախընտրական աշուն 2018․ Աղվան Վարդանյան

ՄԻ ԲԱՐՁՐ ՏԵՂ․ Նախընտրական աշուն 2018․ Աղվան Վարդանյան

Աղվան Վարդանյանը ֆեյսբուքյան իր էջում գրում է․

Աղվան Վարդանյան
ՄԻ ԲԱՐՁՐ ՏԵՂ
Նախընտրական. աշուն 2018
1.
Մոտեցնում են աշխուժորեն
Անբովանդակ հրաշալին.
Մի բարձր տեղ նստեմ խաղաղ,
Ծիծաղելով նայեմ նորեն
Ընտրյալներիդ ընտրարշավին։
շ
Վազվզում են խելապատառ,
Որ մտնեն այս կամ այն ցուցակ.
Բարձր մի տեղ նստեմ խաղաղ,
Տեսնեմ՝ այսքան աննպատակ
Ոնց են անում Քեզ ցիրուցան։
3
Արեւմուտքից խմբով կգան,
Հյուսիսներից՝ խմբով մի այլ.
Տեղ մի բարձր նստեմ խաղաղ,
Դիտեմ պարը այս խելագար՝
Անհոդաբաշխ ու անդայլայլ։
4.
Ընտրապայքարն ամենաթեժ
Վարելու է խումբը գժի.
Խաղաղ նստեմ բարձր մի տեղ,
Նայեմ աչքով ամենատես՝
Ոնց եք ընտրում լորտու-իժին։
5.
Շարժելու է զորագնդեր՝
Ոստիկան ու դիպուկահար.
Խաղաղ՝ բարձր մի տեղ նստեմ,
Ու հետեւեմ հույժ ակնդետ
Ընտրողներին սարսափահար։
6
էլ թալանչի, էլ դավաճան՝
Ղժժալու են ջահել, ավագ.
Տեղ մի բարձր խաղաղ նստեմ
Ու վայելեմ էս անվախճան
Գժանոցը համահավաք։
7
Չկա նախկին, չկա ներկա՝
Խաբելու են խոսք ու փողով.
խաղաղ նստեմ մի բարձր տեղ,
Մինչեւ կրկեսն անհամ-երկար
Դառնա Ազգա-խառնա-ժողով։
Հ.Գ.
Էս էլ կանցնի՝ մի պատի տակ՝
Բ-ի, Գ-ի քառասունին.
Բարձր՝ խաղաղ մի տեղ նստեմ,
Դիմավորեմ նոր խեղկատակ
Քաղաքական անասունին։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ