Արևմտյան դիվանագետների հետ հանդիպում եղել է, բայց դրանք գաղտնի բանակցություն չեն. ՌԴ պաշտոնյաներ

ՌԴ ԱԳՆ պաշտոնական ներկայացուցիչ Մարիա Զախարովան հաստատել է տեղեկությունը ԱՄՆ, ԵՄ եւ Ռուսաստանի դիվանագետների հանդիպման մասին Արցախի դեմ Ադրբեջանի ագրեսիայից մի քանի օր առաջ։

«Գաղտնիի մասին չգիտեմ։ Մեզ դիմել են ԱՄՆ-ն, ԵՄ-ն... Խնդրել են հանդիպում ունենալ, ինչ-որ շփումներ։ Հանդիպման ընթացքում կողմերը տեսակետներ են փոխանակել իրավիճակի վերաբերյալ։ Այս է ամենը։ Իսկ եթե հիմա պատմությունն այդ հանդիպման հետ կապված խաղարկվելու է արեւմտյան ԶԼՄ-ներում որպես սադրիչ, նշանակում է՝ այդպիսն էլ եղել է ԱՄՆ եւ ԵՄ նպատակը՝ ստեղծել հերթական սադրանքը։ Դրանում ոչ մի գաղտնի բան չի եղել, դա կարծիքների շարքային փոխանակում էր։ Բայց մեկ անգամ էլ կրկնեմ՝ կհետեւենք, թե ինչպես է Արեւմուտքն այժմ մատուցելու այս ամենը։ Այստեղից էլ հասկանալի կդառնան նախնական նպատակները»,- նշել է նա։

Այս հանդիպմանն անդրադարձել է նաև ՌԴ նախագահի խոսնակ Դմիտրի Պեսկովը:

«Այդքան էլ այդպես չէ, ինչպես նկարագրում են։ Շատ սխալներ կան այդ նյութում։ ԼՂ հարցում որոշակի շփումներ եղել են, սակայն դրանք այն բանակցություններ չէին, որոնց մասին նշված է»,- ասել է նա։

Ավելի վաղ Politico-ն տեղեկացրել էր ԱՄՆ, ԵՄ եւ Ռուսաստանի ներկայացուցիչների գաղտնի բանակցությունների մասին Թուրքիայում։ Նրա տվյալներով՝ հանդիպումը կայացել է Արցախի դեմ Ադրբեջանի հարձակումից մի քանի օր առաջ։